Trampla Netanyahu arasında “cəhənnəm mübahisəsi” - Təl-Əviv açıqlama yaydı, Ağ Ev susur

İsrailin Baş naziri Binyamin Netanyahu və ABŞ Prezidenti Donald Tramp İranla hərbi əməliyyatların yenidən başlanması ehtimalı ilə bağlı telefon danışığı aparıblar.

Publika.az xəbər verir ki, bu barədə “Ynet” nəşri məlumat yayıb.

Portalın həmsöhbətlərinin sözlərinə görə, tərəflərin İslam Respublikasına qarşı yeni zərbələrin endirilməsi məsələsində fikir ayrılığı səbəbindən söhbət “xüsusilə gərgin və kəskin” olub. Mənbələrdən biri danışığı “cəhənnəm mübahisəsi” adlandırıb.

“Ynet”in məlumatına görə, İsrail Baş nazirinin dəftərxanası bu iddiaları təkzib edərək, söhbətin “tamamilə sakit” keçdiyini vurğulayıb. İsrailin yüksəkvəzifəli rəsmisi də telefon danışığının baş tutduğunu təsdiqləyib, lakin söhbətin “heç də mürəkkəb olmadığını” bildirib.

Bundan əvvəl ABŞ dövlət katibi Marko Rubio İrana qarşı yeni zərbələrin endirilməsinə hazırda ehtiyac olmadığını bəyan edib. Onun sözlərinə görə, Vaşinqton Tehrana qarşı iqtisadi təzyiqləri davam etdirməyi planlaşdırır.

Hüseyn İbadlı