“Mədəniyyət.az” jurnalı - Ötən ilin son sayı

Jurnal bu sayı ilə ötən 2019-cu il üçün sizə olan son borcunu da ödədi, əziz oxucular!

İl ərzində “Mədəniyyət.az” jurnalının səhifələrində ölkənin demək olar ki, bütün mədəniyyət hadisələri öz əksini tapdı, yubileylər, bədii və sənədli filmlər, maraqlı teatr hadisələri, festivallar, nəfis elmi və bədii nəşrlər, mədəni irsimizlə bağlı bütün əhəmiyyətli layihələr, beynəlxalq aləmdə ölkənin qazandığı uğurlar və dövlətin reallaşdırdığı qlobal mədəniyyət tədbirləri – heç biri diqqətdən kənarda qalmadı. İmadəddin Nəsimi ilinin ən maraqlı nəşr hadisəsi də elə “Mədəniyyət.az” jurnalının xüsusi buraxılışı oldu .

Jurnalın son sayına yenə də il ərzində təşkil olunan mədəni tədbirlərin məcmusu kimi baxıla bilər. Əvvəlcə mədəniyyət xəbərlərinə ekskursla oxucuya bir xülasə təqdim edilir, daha sonra isə konkret olaraq Bakının və bölgələrimizin mədəniyyət və sənət həyatında baş verən maraqlı faktlardan söhbət açılır.

Belə ki, VI Bakı kitab sərgisi, dahi Carli Çaplinin vəfatının 130 illiyi, YUĞ teatrının 30, teatrın yaradıcısı Vaqif İbrahimoğlunun 70 illik yubileyi, Akademik Musiqili Teatrın premyerası, rəqs sənətinin Tamilla Şirəliyeva kimi ustadları haqqında yazı, görkəmli bəstəkarımız Fərəc Qarayev haqqında əcnəbi jurnallarda çıxan məqalə, Bakıda keçirilən “Aliminium” - VI Bakı Beynəlxalq Müasir İncəsənət Byennalisi haqqında məqalə, xalqımızın adət-ənənəsini özündə qoruyub saxlayan həsirçilik sənətindən bəhs edən elmi-publisistik esse, Bakı kəndlərindən Balaxanı abidələrinə həsr olunmuş yazı və doğma Təbrizin havasını udduran səyahət xatirələri ilə qarşınızda səhifələnir.

Həmişəki kimi, Ali Attestasiya Komissiyasının nəşri olaraq elmi məqalələrin də sayı kifayət qədər zəngin və məzmunludur.

Jurnal 2019-cu il fəaliyyətini bu sayla başa çatdırır və böyük məmnuniyyətlə 2020-ci ildə də uğur və əzmlə çalışmaq ümidindədir.