Bu ölkə Aİ-nin iqlim qanunvericiliyini pozur - ŞİKAYƏT

İsveç Təbiəti Mühafizə Cəmiyyəti və Ətraf Mühit Hüquqşünasları Assosiasiyası İsveç hökumətinə qarşı Avropa Komissiyasına şikayət edərək, ölkənin iqlim siyasətinin Aİ tələblərinə cavab vermədiyini bildirib.

Publika.az xəbər verir ki, onların fikrincə, İsveçin milli enerji və iqlim planı emissiyaların azaldılması ilə bağlı məqsədlərə nail olmağa imkan vermir.

Təbiəti Mühafizə Cəmiyyətinin sədri Beatris Rindevall qlobal iqlim böhranı zamanı İsveçdə emissiyaların artırılmasının məsuliyyətsizlik olmaqla yanaşı, həm də Aİ qanunvericiliyinə zidd olduğunu vurğulayıb.

İqlim qrupları şikayəti digər Aİ ölkələrinin ətraf mühit qruplarının dəstəyi ilə veriblər ki, onlar da hökumətlərinin siyasətindən narazılıqlarını ifadə edirlər. Ətraf Mühit Hüquqşünasları Assosiasiyasının sözçüsü İda Edlinq bildirib ki, İsveç kimi zəngin ölkələrin emissiyaları azaltmaq üçün tarixi və hüquqi məsuliyyəti var və daha iddialı iqlim fəaliyyətinə təkan verməlidir. O, Aİ-nin aşağı hədəflərinə baxmayaraq, İsveçin öz öhdəliklərini yerinə yetirmədiyini vurğulayıb və bunun fəlakət olduğunu bildirib.

İqlim və ətraf mühit naziri Romina Purmuxtari ittihamlara cavab olaraq hökumətin iqlim problemlərinin həlli üçün fəal işlədiyini və onun fikrincə, tənqidin siyasətin təkmilləşdirilməsi üçün konkret təkliflərlə müşayiət olunmadığını vurğulayıb.

Avropa Komissiyası İsveçin iqlim planının Aİ qanunvericiliyinə uyğunluğunu yoxlamağı planlaşdırır. İsveçin iqlim siyasətinin qaydaları pozduğu aşkar edilərsə, Avropa Komissiyası hüquqi prosedurlara başlaya bilər. Nəticə əlverişsiz olarsa, hökumətdən iqlim planını tənzimləmək üçün əlavə tədbirlər görməsi və ya böyük cərimələrin ödənilməsi tələb olunacaq.