Makron bu 3 lideri toplantıya çağırmadı, ortalıq qarışdı: Görün nə tələb edirlər

Çexiya, Rumıniya və Sloveniya Avropa liderlərinin Parisdə Fransa prezidenti Emmanuel Makronun təşkil etdiyi sammitə dəvət almamalarından narazıdırlar.

Publika.az xəbər verir ki, bu barədə "Le Monde" qəzeti Fransa liderini təkəbbürlükdə ittiham edən Çexiya hökumətindəki mənbəyə istinadən yazıb.

"Polşadan başqa, Çexiyadan daha müharibəyə yaxın ölkə yoxdur. Heç bir ölkədə adambaşına daha çox ukraynalı qaçqın düşmür və biz ən səmərəli silah təchizatı sistemlərindən birini işlədirik".

Prezidentin müdafiə və təhlükəsizlik məsələləri üzrə müşaviri Kristian Diakonesku Rumıniyanın səylərinə baxmayaraq, bu müzakirəyə dəvət edilməməsindən təəssüfləndiyini bildirib. Eyni zamanda, o, Buxarestin fikrinin gələcəkdə nəzərə alınacağına inandırıb:

“Müzakirə mövzuları NATO-nun Qara dəniz regionu kimi şərq cinahının təhlükəsizliyi və sabitliyi ilə bağlı olmayacaq və ən əsası, heç bir qərar qəbul edilməyəcək, amma sizi əmin edə bilərəm ki, bizi də əhatə edəcək əlavə işlər olacaq”.

Sloveniya prezidenti Nataşa Pirc Musar hesab edir ki, digər Avropa liderlərinin iştirak etməməsi Ukraynada sülhün əldə edilməsi səyləri ilə bağlı "yanlış siqnal göndərir".

"Paris sammitinin təşkilatçıları simvolik müstəvidə dünyaya nümayiş etdirirlər ki, hətta Avropada da ölkələrə bərabər münasibət yoxdur. Bu, Avropaya inteqrasiya prosesinin ruhuna uyğun deyil. Bu, bizim səy göstərdiyimiz, dünyada hörmət edilən Avropa deyil. Bu, şimali amerikalı müttəfiq üçün layiqli tərəfdaş ola biləcək Avropa deyil", - Sloveniya lideri qeyd edib.

Qeyd edək ki, Avropa liderləri ABŞ-ın təşəbbüsü ilə Ukraynada müharibəyə son qoymaq üçün danışıqlara dəvətin olmamasından narahat olduqlarını bildirirlər. Buna görə də Fransa prezidenti Emmanuel Makron Parisdə bir sıra ölkələrin liderləri, NATO və Avropa İttifaqının nümayəndələri ilə təcili toplantı çağırıb. ABŞ dövlət katibi Marko Rubio Avropa və Ukraynanın ciddi mərhələyə çatdıqda danışıqlara cəlb ediləcəyini, lakin prosesin hələ ilkin mərhələdə olduğunu söyləyib.

Akqabay