İran ABŞ-la yenə üz-üzə gəlir - Tarix və məkan AÇIQLANDI

İran və ABŞ nümayəndə heyətləri arasında danışıqların ikinci raundu aprelin 19-da Romada baş tutacaq.

Publika.az xəbər verir ki, bu barədə Oman Xarici İşlər Nazirliyinin mətbuat xidməti məlumat yayıb.

"Danışıqların məqsədi ədalətli, məcburi və davamlı razılaşmaya doğru gələcək irəliləyişə nail olmaq olacaq", - diplomatik departamentin bəyanatında deyilir.

Aprelin 12-də Omanda İran və ABŞ arasında dolayı danışıqlar baş tutub. Görüş zamanı tərəflər vasitəçilər vasitəsilə fikir mübadiləsi aparıblar. Danışıqlar iki saatdan çox davam edib.

Vaşinqton və Tehran nüvə probleminin həllinin əsas məqamlarını və İrana qarşı sanksiyaların mümkün ləğvini bir daha müzakirə etmək niyyətindədir.

Tehrana gəlincə, çətin ki, uranın zənginləşdirilməsi səviyyəsini aşağı salsın, çünki ABŞ Prezidenti Donald Tramp artıq 2018-ci ildə bu məsələ ilə bağlı razılaşmanı pozub.

İranın xarici işlər naziri Abbas Əraqçi deyib ki, İran mümkün saziş üzrə ABŞ-la danışıqlara başlamağa hazırdır, lakin Tehranın uranı zənginləşdirmək hüququ müzakirə olunmur.

Hüseyn İbadlı