Parisdə etiraz aksiyası insidentsiz başa çatdı

Fransada “Sarı jiletlilər” hərəkatının koordinasiyası və gənclər təşkilatlarının təşəbbüsü ilə həyat bahalılığına qarşı etiraz aksiyaları noyabrın 14-də beşinci həftəsonu ardıcıl olaraq davam edib.

Publika.az xəbər verir ki, Paris polisi prefekturasının məlumatına görə, paytaxtda Respublika meydanından başlayan yürüş günün sonuna yaxın Millət meydanında insidentsiz başa çatıb. Bununla belə, Şalinyi küçəsində kiçik bir qrupun hüquq-mühafizə orqanlarının əməkdaşlarına müxtəlif əşyalar atması səbəbindən polis etirazçıları dağıtmaq üçün gözyaşardıcı qazdan istifadə edib.

Polis mənbələrinin məlumatına görə, Paris istisna olmaqla, ölkə üzrə aksiyalarda 70–120 min nəfərin iştirakı gözlənilirdi. Paytaxtda isə 30–60 min nümayişçinin toplaşacağı proqnozlaşdırılmışdı.

Daxili işlər naziri Loran Nünezin açıqlamasına əsasən, təhlükəsizliyin təmin olunması üçün ölkə üzrə təxminən 70 min polis və jandarm səfərbər edilib.

Bu dəfə etirazların gündəliyi yalnız həyat bahalılığı ilə məhdudlaşmayıb. Aksiyalar çərçivəsində uşaqlara və yeniyetmələrə qarşı zorakılığa, polis zorakılığına, habelə hüquq-mühafizə orqanlarının silah tətbiqinə dair qanun layihəsinə qarşı da etirazlar keçirilib. İqlim dəyişikliyi ilə mübarizə tərəfdarları da yürüşlərə qoşulublar.

Daxili işlər naziri həmkarlar ittifaqlarının rəsmi yürüş marşrutları elan etməməsinin təhlükəsizlik baxımından əlavə risklər yaratdığını bildirib. Onun sözlərinə görə, bəzi icazəsiz yürüşlərin hüquq-mühafizə orqanları ilə qarşıdurmaya çevrilməsi ehtimalı mövcud olub.

Dövlət sektorunun həmkarlar ittifaqları noyabrın 17-də ümumxalq tətili və etiraz aksiyaları keçirməyə çağırıblar.