ABŞ-ı 10 qat üstələyən ölkə - FOTOLAR

İnternet erasında kitabxanaya gedib kitab götürmək, bir o qədər məşhur olmaya bilər, ancaq bir ölkə var ki, orada hələ də kitabxana mədəniyyəti çox əhəmiyyətli yerə sahibdir. Burada insanlar hansı eranın olmasından asılı olmayaraq kitabxanalardan üz çevirmir, əksinə kitaba daha sıx bağlanırlar. Söhbət Avropa mədəniyyətinin beşiklərindən biri olan Çexiyadan gedir.

Publika.az Çexiyada olan kitabxanalar haqqında bilgiləri təqdim edir:

Çexiyada hara baxsanız kitabxana görərsiniz desək, yalan olmaz.

"Bill & Melinda Gates" fondunun araşdırmalarına görə, bura dünyanın ən sıx kitabxana şəbəkəsinə sahib ölkədir. Çexiyada ibtidai təhsil məktəbindən daha çox kitabxana var. Ölkədə hər 1917 vətəndaşa bir kitabxana düşür. Bu, Avropa ölkələrindəki ümumi statistikanın təxminən dörd hissəsini təşkil edir. Hər 19 min 583 adama bir kitabxana düşən ABŞ-ın göstəricilərinin isə 10 qatına bərabərdir.

Çexiyada bu qədər kitabxana olmasının səbəbi isə bunun kitabxana haqqında qanunla nizamlanmasıdır. Bu qanun 1919-ci ildə Çexiyanın müstəqilliyə qovuşması ilə qüvvəyə minib. Belə bir qanunun qəbulunda məqsəd Avstriya-Macarıstan imperiyasından ayrılan almandilli ölkəni ana dilində dünya ədəbiyyatı ilə tanış etmək idi.

Əminliklə qanun öz bəhrəsini verdi deyə bilərik. Çexiya Milli Kitabxanasının direktoru Vit Riçterin sözləri də bunu təsdiq edir: "Çexlər digər xalqlara nisbətən daha çox oxuma vərdişi əldə edib. Ölkəmizdə adambaşına ildə 11 kitab çap olunur".

Kitabxana qanunu alman işğalı, hətta kommunist dövründə belə qüvvədə qaldı. 2001-ci ildə ölkədə 6019 kitabxana var idi. O gündən bəri bu kitabxanaların təxminən 11%-i ya birləşdirildi, ya da bağlandı. Ən böyük kitabxanası 1722-ci ildə yaradılan Klementinudur. Kitabxanada təxminən 20 mindən çox kitab var. Bura dünyada üçüncü ən böyük kitabxana hesab olunur.

Çexiyada kitabxanalar seçkilər zamanı səs vermə yeri kimi də istifadə edilir. Həmçin, kitabxanalar beynəlxalq görüşlərə ev sahibliyi edir. Burada oxu klubları, sərgilər təşkil edilir, kompüter kursları keçilir və gün boyu məktəbliləri qəbul olunur.

Dilrubə Vaqifzadə