ABŞ prezidentliyə namizəd, milyarder Donald Tramp Yaxın Şərqdəki qeyri-sabit vəziyyəti Müəmmər Qəddafi və Səddam Hüseynin yoxluğu ilə izah edib.
Publika.az xarici mediaya istinadən xəbər verir ki, milyarder NBC telekanalına müsahibəsində bugünkü Yaxın Şərq üçün Müəmmər Qəddafi və Səddam Hüseynin olmamasından təəssüfləndiyini dilə gətirib.
“Yaxın Şərqdə vəziyyət daha sabit olardı, əgər Səddam Hüseyin və Müəmmər Qəddafi hakimiyyətlə qalsaydılar”, - amerikalı milyarder deyib.
O, Suriya prezidenti Bəşər Əsədlə İraq və Liviyanın keçmiş liderlərini müqayisə edib.
Qeyd edək ki, 2011-ci ildə ABŞ-ın dəstəyi ilə Qəddafinin devirilməsindən sonra Liviyada vətəndaş müharibəsi başlanıb. Ölkədə hazırda iki hökumət fəaliyyət göstərir: dünya cəmiyyəti tərəfindən tanınan hökümət (Tobruk şəhərindədir) və islamçı hökumət (Tripoli şəhərindədir).
Səddam Hüseyn isə 2003-cü ildə ABŞ-ın başçılıq etdiyi beynəlxalq koalisiya tərəfindən devrilib. Hazırda isə ölkənin böyük hissəsi İŞİD terror qruplaşmasının nəzarətindədir.
