Tanınmamış «Donetsk Xalq Respublikası»nın başçısı Aleksandr Zaxarçenko oktyabrın 10-da yerli seçkilərin vaxtının dəyişdirilməsi haqqında sərəncam imzalayıb.
Publikaş.az xəbər verir ki, seçkilər bu il oktyabrın 18-də keçirilməli olsa da, 2016-cı il aprelin 20-nə təxirə salınıb.
«Luqansk Xalq Respublikası»nın lideri İqor Plotnitski də eyni gündə oxşar bəyanat verib. O da Donbasda keçiriləcək seçkilərin vaxtının dəyişdirildiyini bildirib.
Tanınmamış respublikaların nümayəndələri seçkilərin «Normand dördlüyü»nün Paris sammitinin nəticələrinə əsasən ertələndiyini bildiriblər. Bu müddətdə Ukrayna Minsk razılaşması ilə üzərinə düşən öhdəlikləri yerinə yetirməli və Donbasa xüsusi status verməlidir.
Ukraynada yerli orqanlara seçkilər oktyabrın 25-ə təyin olunub. Kiyev də, Qərb dövlətləri də separatçıların nəzarətində olan ərazilərdə də seçkilərin Ukraynanın başqa bölgələriylə eyni vaxtda keçirilməsini istəyirlər.
