Ankaranı qana boyayan terrorçunun qardaşı əsir düşdü

Ankarada 99 nəfərin öldüyü terror aktını həyata keçirən 2 kamikadzedən biri olduğu deyilən Ömər Dəniz Dündarın əkiz qardaşı Mahmud Qazi Dündar Suriyada YPG-yə (PKK terror təşkilatının Suriyadakı qolu PYD-nin hərbi qanadı) əsir düşüb.

Publika.az Türkiyə mediasına istinadən xəbər verir ki, “Toxucular” qrupunun üzvü olan Ömər Dəniz Dündar əkiz qardaşı ilə birlikdə qeyri-qanuni yollarla Suriyaya keçib və burada İŞİD-ə qatılıb.

Türkiyənin Adıyaman vilayətindən olan gənclərin daxil olduğu “Toxucular” qrupuna Suriyada “Konsantin” Batalyonu adı verilib. Türk gənclərdən təşkil edilən batalyon İŞİD-in paytaxtı hesab olunan Rakka və İŞİD-in bu ilin iyun ayına qədər nəzarətdə saxladığı Tel-Abyad mahalında hərbi təlim alıb.

Tel-Abyad iyun ayında YPG və Azad Suriya Ordusunun qolu olan “Burxan Əl-Firat” qrupu tərəfindən İŞİD-dən alınıb. Bundan sonra İŞİD-in bir çox üzvü Rakkaya qaçıb. YPG gücləri isə mahalda axtarışlar zamanı Mahmud Qazi Dündarı ələ keçirib və İŞİD üzvü olduğunu öyrənəndən sonra Tel-Abyad həbsxanasına salıb.

YPG-dəki mənbələr də Mahmud Qazi Dündarın Tel-Abyad həbsxanasında olduğunu təsdiqləyiblər. Onun həyat yoldaşı Merve Dündarın isə Rakkaya qaçdığı təxmin edilir.

Qeyd edək ki, oktyabrın 10-da Ankarada terror aktı törədilib. İki partlayış nəticəsində 99 nəfər həlak olub. Partlayışı törədən kamikadzelərin Yunus Əmrə Alagöz və Ömər Dəniz Dündar olduğu açıqlanıb.

Ömər Dağlı