ABŞ İraqı hədələdi: “Əgər Rusiyadan kömək istəsən...”

İraq İŞİD terror qruplaşmasına qarşı əməliyyatların keçirilməsi üçün Rusiyadan kömək istəsə, ABŞ İraqa yardımı dayandıracaq”.

Publika.az “İnterfaks” agentliyinə istinadən xəbər verir ki, bu barədə İraqın baş naziri Haydar əl-İbadi ilə görüşü şərh edən ABŞ ordusunun qərargah rəislərinin birləşmiş komitəsinin sədri Cozef Danford bildirib.

“Mən baş nazirə bildirdim ki, İraq ərazisində hərbi əməliyyatlarda iştirak üçün Rusiyaya müraciət edərlərsə, ABŞ-ın İraqa yardımı çox çətin olacaq. ABŞ rusiyalılarla eyni vaxtda İraqda əməliyyat keçirə bilməyəcək”, - o deyib.

Cozef Danford etiraf edib ki, kömək üçün İraqın Rusiyaya mümkün müraciəti haqqında xəbərlər Vaşinqtonda narahatlıq yaradıb.

Daha əvvəl Rusiya Xarici İşlər Nazirliyinin başçısı Sergey Lavrov bildirib ki, İraq rəhbərliyi İŞİD-ə qarşı əməliyyatlarda Rusiyanın iştirakı üçün müraciət edərsə, bu məsələ müzakirə oluna bilər.

Qeyd edək ki, Rusiya Suriyada İŞİD-ə qarşı əməliyyatlara məhz Dəməşqin müraciətindən sonra başlayıb. Bu baxımdan da Moskva Suriyadakı əməliyyatları beynəlxalq hüquqa uyğun hesab edir.

Ömər Dağlı