Amerika təşviş içində: “cəhənnəm silahı” bir ilə hazır olacaq

Rusiyanın ən yeni ballistik raketi olan “Sarmat”ın prototipi istehsal edilib.

Publika.az xəbər verir ki, bu barədə müdafiə-sənaye kompleksindəki mənbəyə istinadən SİTA agentliyi bildirib. Məlumata görə, Plesetsk kosmodromunda uçuş-konstruktor sınaqlarının 2016-cı ilin yaz-yay aylarında keçirilməsi planlaşdırılıb. Məlumata görə, raketin konstruksiyasının bütün elementləri Krasnoyarsk maşınqayırma zavodunda istehsal edilib.

Mənbə dəqiqləşdirib ki, “Sarmat”ın sınaqları Plesetsk kosmodromunda sınaqlar üçün istifadə ediləcək işəsalma qurğusunun yenidən təchiz edilməsindən asılıdır. Qurğunun quraşdırılması üzrə işlərin 2016-cı ilin mart ayında başa çatdırılması planlaşdırılır.

“Sarmat” strateji raket kompleksi 15A18M ağır raketləri ilə təchiz olunan sovet istehsalı “Voyevoda” R-36M2 komplekslərini əvəz edəcək. Yeni raket 4 tona yaxın nüvə başlığını 10 min km-ə qədər məsafəyə daşıya biləcək. Ballistik raket üzərindəki işlər ABŞ-ı təşvişə salıb. Bəzi ekspertlər bu raketin ABŞ üçün “cəhənnəm silahı” ola biləcəyini bildirirlər. “Sarmat”ın tək ballistik trayektoriya üzrə yox, eyni zamanda atmosferin yuxarı qatlarında da hərəkət etmək imkanına malik olacağı bildirilir.

Ömər Dağlı