Sarkisyanın təyyarəsi partladılmalı idi – ŞOK PLAN

Ermənistan Milli Təhlükəsizlik Xidməti tərəfindən neytrallaşdırılmış cinayətkar qruplaşma respublikanın dövlət idarələrini tutmağı və prezident Serj Sarkisyanın təyyarəsinə hücum etməyi planlaşdırırdı.

Publika.az xəbər verir ki, bu barədə Ermənistanın “Qraparak” nəşri məlumatlı mənbəyə istinadən bildirib.

“Cinayətkar qruplaşma prezident iqamətgahını, hökumət, parlament, Konstitusiya Məhkəməsi və teleqülləni eyni zamanda tutmağı planlaşdırırdı. Əsas əməliyyat isə Fransaya səfərə hazırlaşan Ermənistan prezidentinin təyyarəsinin partladılması idi”, - mənbə deyib.

Onun sözlərinə görə, əməliyyat yaxşı planlaşdırılmışdı, ancaq qruplaşmanın rəhbəri Artur Vardanyan görüşməməli olduğu insanlarla görüşərək səhvə yol verib.

Qeyd edək ki, noyabrın 25-də Milli Təhlükəsizlik Xidmətinin əməkdaşları polislə birlikdə əməliyyat keçirərək İrəvanın ətrafındakı evlərdən birində silahlı dəstəni zərərsizləşdirib.

Dekabrın 19-da isə Ermənistan müdafiə nazirinin keçmiş müavini Vaan Şirxanyan həbs edilib. İstintaq onun Artur Vardanyan tərəfindən yaradılan cinayətkar qruplaşmada iştirakı və fəaliyyətindən şübhələnir. Ümumilikdə cinayətkar qruplaşmanın 30 üzvü həbs edilib.

Sözügedən qruplaşmanın 5 yarımqrupdan təşkil olunduğu bildirilir.

Ömər Dağlı