BMT baş katibi Afrika liderlərinə müraciət edib

"Afrika liderləri Burundidəki zorakılıqların qarşısını almaq üçün daha artıq gözləyə bilməz, zaman keçdikcə orada daha çox insan ölür".

Publika.az xəbər verir ki, bu barədə BMT baş katibi Ban Ki-Mun bildirib. Afrika Birliyi liderlərinin Efiopiyada keçirilən sammitində jurnalistlərə açıqlama verən BMT rəhbəri oradakı vəziyyəti insan ləyaqəti və hüquqları məsələsi adlandırıb.

"Ona görə də, Afrika liderləri təcili olaraq bir səs olaraq addım atmalı və prezident Pierre Njurunzuza və onun hökumətini hərtərəfli danışıqlarda iştiraka dəvət etməlidirlər," deyə Ban Ki-Mun bildirib.

Şənbə günü Ban Ki-Mun sammitdə bildirib ki, Burundidə sülhməramlıların yerləşdirilməsi vacibdir. Ancaq Burundi hökuməti bildirib ki, Afrika Birliyi qüvvələrinin hər hansı addımı ölkəyə hərbi müdaxilə kimi qiymətləndiriləcək.

Afrika Birliyi keçən il başlayan siyasi zorakılığın qarşısını almaq üçün 5000 sülhməramlını Burundiyə göndərməyi nəzərdən keçirir. İğtişaşlar prezident Nkurunzizanın 3-cü müddətə prezident seçilmək istəməsindən sonra başlayıb.