Obama 7 milyard dollar tələb edir

ABŞ administrasiyası İŞİD terror qruplaşması ilə mübarizə üzrə kampaniyaya 2017-ci ildə ayrılan maliyyənin artırılmasına nail olmağa çalışır.

Publika.az xəbər verir ki, bu barədə “Reuters” agentliyi administrasiyadakı anonim məmurlara istinadən bildirib.

Məlumata görə, Barak Obama administrasiyası Konqresdən terrorçularla mübarizə üzrə xərcləri 7 milyard dollara qədər artırmağı xahiş edəcək.

ABŞ-ın 2017-ci il müdafiə büdcəsi layihəsi təxminən 583 milyard dollar nəzərdə tutulub. 2016-cı ildə ABŞ-ın qüvvədə olan müdafiə büdcəsi isə 607 milyard dollar təşkil edib.

ABŞ Müdafiə Nazirliyi (Pentaqon) Avropadakı güclərin genişləndirilməsi üçün 2017-ci ildə 3,4 milyard dollar xərcləməyi planlaşdırır. Bu isə eyni məqsəd üçün 2016-cı ildə ayrılan vəsaitdən dörd dəfə çoxdur. 2016-cı ildə Avropadakı güclərin genişləndirilməsi üçün 780 milyon dollar ayrılıb. Məmurların sözlərinə görə, Avropadakı güclərə ayrılan maliyyəni artırmaqla ABŞ NATO üzrə müttəfiqlərinə sədaqətini nümayiş etdirmək istəyir.

Ömər Dağlı