İNANILMAZ: Ölkənin ikinci böyük gölü qurudu – FOTO

Boliviyada sahəsinə görə ölkənin ikinci böyük gölü sayılan Poopo gölü quruyaraq yoxa çıxıb.

Publika.az xarici mətbuata istinadən xəbər verir ki, bu, Avropa Kosmik Agentliyinin peyk vasitəsilə çəkilişləri zamanı aşkarlanıb. Məlum olub ki, Poopo gölü tamamilə quruyub. Duzlu gölün yoxa çıxmasını Yer kürəsinin səthinin monitorinqi ilə məşğul olan “ЕКА Proba-V” mini peyki üzə çıxarıb.

2014-cü ilin aprelində, 2015-ci ilin iyulunda və 2016-cı ilin yanvarında aparılmış çəkilişlər zamanı məlum olub ki, ərazisi əvvəllər 3000 kvadrat kilometr olan su hövzəsi tədricən buxarlanıb.

3 metr dərinliyə malik göl quraq ərazidə yerləşib. Avropa Kosmik Agentliyindən bildiriblər ki, Poopo bununla yanaşı iqlim dəyişikliyinə də məruz qalıb. Göldə quruma ilk dəfə 1994-cü ildə qeydə alınıb. Lakin bunun qarşısı alınıb. Ekspertlər bildirirlər ki, Pooponun bu dəfə bərpa edilməsi illərlə vaxt aparacaq. Bu səbəbdən göl həmişəlik də yoxa çıxa bilər.

Duzlu Poopo gölü ölkənin cənubunda, Oruro şəhərindən 130 kilometr məsafədə yerləşib. Göl köçəri quşların, o cümlədən flaminqoların məskəninə çevrilmişdi. Poopo sahəsinə görə Titikakidən sonra Boliviyanın ikinci böyük gölü idi.

Anar Tağıyev