Tramp geri çəkildi

ABŞ prezidentliyinə namizəd Donald Tramp illərdir dilə gətirdiyi iddialardan geri çəkilib.

Publika.az xarici mətbuata istinadən xəbər verir ki, o, hazırkı prezident Barak Obamanın ABŞ torpaqlarında doğulduğunu qəbul edib.

Prezidentliyə namizəd D.Tramp ötən gün yeni açılan hoteldəki çıxışı zamanı Obamanın doğulduğu yer barədə bir neçə dəfə səsləndirdiyi fikirlərə yenidən toxunub. Tramp Obamanın ABŞ-da doğulmaması ilə bağlı iddiaları 2008-ci ildə seçkilər zamanı Hilari Klintonun irəli sürdüyünü deyib: “Bunu mən sonlandırdım. Prezident Barak Obama ABŞ-da doğulub”.

Prezident Barak Obama isə D.Trampın bu iddialarını heç vaxt ciddi qəbul etmədiyini deyib. Ağ sarayda jurnalistlərin bununla bağlı suallarını cavablandıran prezident görüləcək onlarla iş olduğu halda belə bir məsələsinin gündəmə gəlməsinin onu təəccübləndirdiyini deyib: “Harada doğulduğumdan tam əminəm. Məncə, xalqım da mənim kimi əmindir”.

Prezidentliyə digər namizəd H.Klinton isə bu iddialarına görə D.Trampı tənqid edib. Amerika xalqından üzr istəməli olduğunu deyib: “Beş ildir doğum yeri məsələsini müzakirə etməklə ilk qara dərili prezidentimizin legitimliyini yox etməyə çalışır. Seçki kampaniyası da belə bir yalan üzərinə qurub. Bu məsələ tarixdən silinməyəcək”.

Qeyd edək ki, ABŞ qanunlarına görə, prezident olmaq istəyən şəxs 35 yaşını tamamlanmalı, 14 il ABŞ-da yaşamalı, doğulduğunda Amerikan vətəndaşı olmalıdır. Ancaq konstitusiyada "doğulduğunda Amerika vətəndaşı olma" şərtinin tərifi yer almır.

Rəsmi sənədlərə görə, ABŞ prezidenti Barak Obama Amerikan torpağı Havayidə doğulub. D.Trampın iddiası doğru olsaydı, o zaman Obamanın prezidentliyi hüquqi baxımdan müzakirələrə yol aça bilərdi.

Gülxar