“ABŞ Rusiyaya göstərdi ki...” - Münaqişə YENİ MƏRHƏLƏDƏ

Rusiya və ABŞ arasında Qurban bayramından əvvəl Suriyada atəşkəsin təmin olunması barədə razılaşma əldə olunsa da, ABŞ-ın başçılıq etdiyi beynəlxalq koalisiyanın Suriya ordusunun mövqelərini bombalaması ölkədə vəziyyəti daha da gərginləşdirib.

Hadisədən dərhal sonra Moskva BMT Təhlükəsizlik Şurasının fövqəladə toplantısını çağırıb. ABŞ-ın BMT-dəki daimi nümayəndəsi Samanta Pauer toplantıda Rusiyanı ikiüzlülük və həyasızlıqda ittiham etdi. Öz növbəsində, Rusiyanın daimi nümayəndəsi Vitali Çurkin etiraz əlamət olaraq zalı tərk edib.

Publika.az xəbər verir ki, ekspertlər “InfoResist” portalına açıqlamasında sözügedən hadisəni şərh ediblər.

Hərbi-hüquqi Tədqiqatlar Mərkəzinin direktoru Aleksandr Musienko qeyd edir ki, ABŞ-la Rusiya və İran arasında Suriya müharibəsi mövzusunda prinsipial fikir ayrılıqları mövcuddur. Onun fikrincə, Suriya ordusunun bombalanması da bu fikir ayrılıqlarının nəticəsidir.

“Faktiki olaraq bu ölkələr münaqişənin müxtəlif iştirakçılarını dəstəkləyir. Xatırladım ki, ABŞ BMT və digər beynəlxalq təşkilatlarda Rusiyanı dəfələrlə dinc əhalini, həmçinin Vaşinqtonun dəstəklədiyi müxalifət güclərini bombalamaqda ittiham edib. Beləliklə, məndə hökumət ordusuna zərbələrin təsadüfi olduğuna dair dərin şübhələr var. Beləliklə, ABŞ Rusiyaya göstərir ki, ehtiyac olduğu halda Amerika Rusiyanın Suriyadakı müttəfiqlərinə qarşı radikal hərəkətlərə hazırdır. Bununla belə iddia etmək olmaz ki, Rusiya və ABŞ-ın münasibətlərində dönüş anı ola bilər”.

Politoloq Viktor Kasprukanın sözlərinə görə, bombardman Suriya münaqişəsini növbəti səviyyəyə qaldırır.

Politoloq Andrey Zolotarevin fikrincə, bombardmanın səhvən edildiyinə dair fikirlər deməyə əsas verir ki, demokratlar hakimiyyətə gələcəyi halda Rusiya ilə bağlı mövqe daha sərt olacaq.

“Əgər ABŞ gələcəkdə münaqişəyə qoşularsa, Əsədə öz hakimiyyətinin qalıqlarını saxlamaq son dərəcə çətin olacaq”, - Zolotarev vurğulayıb.

Ömər Dağlı