Separatçı Abxaziya respublikasına turist kimi gələn rusiyalının ailəsinə burada heç də xoş münasibət göstərilməyib.
Publika.az “Pen.tv”yə istinadən xəbər verir ki, həyat yoldaşı və uşağı ilə birlikdə olan rusiyalı gənci sərhədə qədər təqib edən mehmanxana sahibləri onu burada vəhşicəsinə döyüblər.
Ailə cütlüyünün sözlərinə görə, münaqişə hələ mehmanxanada başlanıb. Gənc və onun arvadı Pitsun yaxınlığında “Leres” adlı mini-mehmanxanada yaşayırdılar. Rusiyalı burada mehmanxana sahibinin oğlu ilə dalaşıb. Mehmanxana sahibinin oğlu öz dostlarını köməyə çağırıb və cütlük mehmanxananı tərk etməyə qərar verib.
Ancaq ailə güman etməzdi ki, dava sonradan onlar üçün əsl dəhşətə çevriləcək. Zərərçəkənlərin sözlərinə görə, təqibçilər onlara çataraq maşını mühasirəyə alıblar. Rusiyalı boks bacarığı sayəsində mehmanxana sahibinin oğlu və onun dostlarının zərbələrini müəyyən qədər dəf edə bilib. Lakin o, bununla belə beyin silkələnməsi, başından ciddi zədələr alıb, burnu sınıb. Həmçinin davanı telefonu ilə çəkən arvadı bir neçə zərbə alıb.
Zərərçəkənlər hüquq-mühafizə orqanlarına müraciət ediblər.
