Tillerson Rusiya ilə hərbi əməkdaşlığın şərtini açıqladı

ABŞ-ın dövlət katibi Reks Tillerson Vaşinqton və Moskva arasında Suriyada hərbi əməkdaşlığın qeyri-mümkünlüyünü dilə gətirib.

Publika.az xəbər verir ki, bu haqda “Reuters” agentliyi diplomatik mənbəyə istinadən bildirib.

Dövlət katibi belə bəyanatla Suriya prezidenti Bəşər Əsədə qarşı çıxan dövlətlərin nümayəndələri ilə danışıqlar zamanı çıxış edib. Mənbə qeyd edib ki, Vaşinqton və Moskva arasında Suriyada hərbi əməkdaşlığın qeyri-mümkünlüyünün əsas səbəbi Rusiyanın bütün Suriya müxalifətinin terrorçu kimi tanımasıdır.

Qeyd edək ki, 2016-cı ilin sentyabrında Rusiya və ABŞ atəşin dayandırılması və əməliyyatların koordinasiyasını nəzərdə tutan Suriya üzrə planı uyğunlaşdırıb. Amma bir ay sonra Vaşinqton əməkdaşlığın dayandırıldığını elan edib.

Rusiya Xarici İşlər Nazirliyi Vaşinqtonu öz üzərinə götürdüyü öhdəlikləri yerinə yetirməməkdə ittiham edib. Moskvaya görə, bu öhdəliklərdən biri də terrorçularla loyal müxalifət arasında hüdud qoyulması ilə bağlı idi. Amma Rusiya və ABŞ Suriyada kimin terrorçu, kimin loyal müxalifət olduğuna dair ümumi fikrə gələ bilməyiblər.

Ömər Dağlı