Son 24 SAAT: ordu Türkiyə sərhədinə çatdı

Müharibənin getdiyi İraqda son 24 saatda baş verənlər dünya mediasının gündəmindədir.

Publika.az xəbər verir ki, dünən Kərkükün Riyad bölgəsində İŞİD terror təşkilatının hücumu nəticəsində İraq ordusunun 4 əsgəri, Haşdi Şabi güclərinin isə 5 üzvü həlak olub. Terror aktı canlı bombanın özünü partlatması nəticəsində baş verib. Bu hücumdan sonra İraq ordusu Suriya ilə sərhəddə İŞİD terrorçularının təmizlənməsi əməliyyatına başlayıb.

Şimali İraq Kürd Muxtariyyətinin rəhbəri Məsud Bərzani prezident və parlament seçkilərini 8 ay təxirə salıb.

İraq ordusu isə Ərbilin nəzarətində olan Türkiyə sərhəd qapısının alınması üçün hücuma keçib. Peşmərgə və Bağdad əsgərləri arasında baş verən toqquşmada hər iki tərəf itki verib.

Ərbilə yaxın şəxslər İraq ordusunun sərhəddə yerləşən Zaho şəhərinə doğru irəliləyərək, türkiyənin Habur sərhəd qapısına açılan İbrahim Halil sərhəd-keçid məntəqəsini ələ keçirməyə çalışdığını deyir. Toqquşma Ankara və Bağdadın aşmaq istədiyi Ovaköy yeni sərhəd qapısına görə baş verir.

Ekspertlər İraq ordusunun YPG ilə Bərzani arasında əlaqənin kəsilməsi, həmçinin, Habur-Ərbil xəttinin nəzarətə götürülməsinə çalışdığını hesab edirlər. İraq ordusu əməliyyatda “yeni mərhələyə” keçdiklərini və hücumlara qarşı ciddi cavab veriləcəyini bəyan edib.

Bu arada məğlub olan Bərzani geri addım ataraq, İraq hökuməti və dünya ictimaiyyətinə qanunsuz “müstəqilik referendumu”nu dondurmaq təklifi ilə çıxış edib.

İraq hökuməti isə Bərzanidən 2003-cü ilə qədərki ərazi bölgüsünün bərpa edilməsini tələb edir.

Asif