Zabit Türkiyədə dövlət çevrilişi hazırlandığı barədə xəbər verdi: MİT hərəkətə keçdi

Milli Kəşfiyyat Xidməti Türkiyədə gözlənilən çevrilişlə bağlı seçkilərdən əvvəl məlumat alıb.

Publika.az “Yeni Şəfəq” qəzetinə istinadən xəbər verir ki, Milli Kəşfiyyat Xidmətinə (MİT) Türkiyədə seçkilərin birinci turuna bir gün qalmış çevrilişlə bağlı daxil olan məlumat təsdiqini tapmayıb.

“Yeni Şəfəq”-in əldə etdiyi məlumata görə, mayın 13-də, saat 13:00 radələrində Dəniz Piyadaları Korpusunun mayoru S.T. MİT-in Çanaqqala bölgə idarəsinə gedərək, 15 iyul 2016-cı ildə baş vermiş dövlət çevrilişinə cəhdə bənzər çevrilişin hazırlandığını bildirib.

Lakin tezliklə ekspertizalar tərəfindən ifadəsi alınan S.T.-nin yalan dediyi məlum olub və onun psixi sağlamlığı ilə bağlı şübhələr yaranıb. Bununla belə, hərbi baza və birləşmələrdə ehtiyat tədbirləri mayın 28-dək davam edib.

Xatırladaq ki, 2016-cı il iyulun 16-na keçən gecə bir qrup qiyamçı Türkiyədə hərbi çevrilişə cəhd edib. Əsas qarşıdurma Ankara və İstanbulda baş verdib. 250-dən çox vətəndaş öldürülüb, 2 mindən çox insan yaralanıb.

Mehti Kamiloğlu