Sloveniya Xorvatiya ilə sərhəddə nəzarəti gücləndirir

Sloveniyanın səlahiyyətli orqanları qaçqın axınının əhəmiyyətli dərəcədə artması ilə əlaqədar Xorvatiya ilə sərhəddə nəzarəti gücləndirir.

Publika.az xəbər verir ki, bu barədə Sloveniya Mətbuat Agentliyi məlumat yayıb.

Bildirilib ki, bəzi sərhəd keçidlərinin arxasında nəzarət-buraxılış məntəqələri qurulub. Eyni zamanda polis qonşu respublika ilə sərhəd nəzarətinin bərpasından söhbət getdiyini təkzib edib. Sloveniyanın hüquq-mühafizə orqanları qeyd edib ki, dövlət yalnız miqrantların gəldiyi dəhlizlərə polis nəzarətini gücləndirir.

Sentyabrın 19-da agentlik xəbər verib ki, Sloveniya polisi 2023-cü ilin səkkiz ayı ərzində 36 137 sərhədi qanunsuz keçmə cəhdi qeydə alıb ki, bu da ötən ilin eyni dövrü ilə müqayisədə 2,5 dəfə çoxdur. Söhbət 9 755 halda Əfqanıstan, 5 605-də Mərakeş vətəndaşlarından gedir. Pakistan vətəndaşları 3 771 dəfə, Banqladeş vətəndaşları 2 956 dəfə, Rusiya vətəndaşları isə 2 419 dəfə Sloveniya sərhədini qanunsuz keçməyə cəhd ediblər. Ən çox pozuntu halları Novo-Mesto bələdiyyəsinin polis qərargahının ərazisində baş verib. Bütün pozuntuların, demək olar, 76 %-i orada qeydə alınıb.