Böyük Britaniya açıqladı: Bu şərt yerinə yetirilsə, Fələstin dövlətini dərhal tanıyacaq

Böyük Britaniyanın xarici işlər naziri David Kemeron bəyan edib ki, ölkəsi Qəzzada atəşkəs əldə edildikdən və HƏMAS-ın bölgədəki mövcudluğunun sona çatmasından sonra iki dövlətli həllin əldə olunmasını gözləmədən Fələstin dövlətini tanıya bilər.

Publika.az xəbər verir ki, Kemeron Livana diplomatik səfəri zamanı “Associated Press” agentliyi ilə Fələstin məsələsini müzakirə edib.

O İngiltərənin Fələstin dövlətini tanıması üçün iki dövlətli həllin yekunlaşmasını gözləməyə ehtiyac olmadığını deyib:

“Proses həllə doğru irəlilədikcə (Fələstini tanımağı) düşünə bilərik. Fələstin xalqının gələcəkdə öz dövlətinə sahib olmasının uzunmüddətli perspektivdə regionun sülh və təhlükəsizliyi üçün vacibdir. Bu baxımdan ilk addım döyüş əməliyyatlarında fasilədir. Bu fasilə də sonda atəşkəslə bitməlidir”.

Böyük Britaniya, ABŞ və digər Qərb ölkələrinin İsrail-Fələstin probleminin iki dövlətli həllinə artan dəstəyi İsrailin baş naziri Benyamin Netanyahu tərəfindən sərt etirazlarla qarşılanıb.

Aysel Şahmar