Əsl təhlükə: Ərdoğan xəbərdarlıq etmişdi

Bəşər Əsəd gücləri Suriyanın ən böyük şəhəri Hələbdə müxalifətin xarici aləmlə yeganə əlaqə xətti olan dəhlizi da bağlayıb.

Publika.az-ın Türkiyə mediasına istinadən verdiyi məlumata görə, Suriya ordusu müxalifətin Hələbin mərkəzi ilə əlaqəsində strateji nöqtə olan Handerata hücum edir.

Handerat itirilsə Hələb rejim tərəfindən tamamilə mühasirəyə alınmış olacaq. Bu halda isə şəhərdəki humanitar vəziyyət daha da pisləşəcək. Hələb itiriləcəyi halda müxalifətin Suriya daxilində aktiv döyüş əməliyyatları apardığı heç bir böyük şəhər qalmayacaq və rejim İŞİD-in əlindəki Rakka və Deyr Ez-Zordan başqa Suriyadakı bütün şəhərləri nəzarəti altına almış olacaq.

Hələbin rejim qüvvələrin əlinə keçməsi isə müxalifətin Türkiyə sərhədinə doğru çəkilməsinə səbəb olacaq. Bu halda Türkiyəyə doğru böyük bir köç dalğasının yaranması da gözlənilir.

Xatırladaq ki, Türkiyə prezidenti Rəcəb Tayyib Ərdoğan Fransa səfərindən qayıdan zaman təyyarədə jurnalistlərin suallarını cavablandırarkən Suriyada əsl təhlükə altında olan şəhərin Hələb olduğunu bildirmişdi: “Kobanini bir tərəfə buraxın, Hələb təhdid altındadır. Hələb Şimali Suriyanın ürəyidir və təəssüf ki, orada böyük bir tarix yox olmaq üzrədir”.

Ömər Dağlı