Yeni dövlət qurulur: müstəqilliyini elan etmək üzrədir - FOTO

Qrenlandiya yavaş-yavaş Danimarkadan ayrılaraq müstəqilliyini elan etməyə doğru irəliləyir.

Publika.az xəbər verir ki, Qrenlandiya iyunun əvvəlində konstitusiya layihəsini təqdim edib. Bu gün Rusiya ilə ABŞ arasındakı münaqişə strateji yerləşdiyi adanı daha da vacib edir. Bununla belə, Qrenlandiyanın keçəcəyi yol bəlli olsa da, onun tam suverenlik məqsədinə nə vaxt çatacağı, hətta olub-olmayacağı dəqiq deyil.

1950-ci illərin əvvəllərindən bəri ABŞ Hərbi Hava Qüvvələri adanın şimal-qərb ucunda yerləşən “Thule” bazasında fəaliyyət göstərir. Arktika Dairəsindən 1200 kilometr şimalda yerləşən bu baza ABŞ silahlı qüvvələrinin ən şimal bazasıdır. Əvvəlcə Strateji Hava Komandanlığının əfsanəvi “B-52” bombardmançıları üçün tikilən baza illər ərzində erkən xəbərdarlıq raketdən müdafiə sisteminin əsas hissəsinə çevrilib. “Thule” 2020-ci ildə ABŞ Kosmik Qüvvələrinə inteqrasiya edilib.

NATO-nun qurucu üzvü olan Danimarka ABŞ-ın Qrenlandiyadakı hərbi obyektlərinə hüquqlar verməklə razılaşır, hətta bəzi hallarda yerli sakinlərin zorla çıxarılmasına razılıq verir. Danimarka tərəfinin yeganə tələbi onun bayrağının ABŞ bayrağının yanında dalğalanması olub.

Qrenlandiyanın sabiq baş naziri Kim Kielsen adanın satılmadığını açıq şəkildə qeyd etmişdi, hətta satışda olsa belə, təklifin Danimarkaya deyil, Qrenlandiyaya yönəldilməli olduğunu bildirmişdi. Kopenhagendən olan baş nazir Mette Frederiksen də eyni bəyanatla çıxış edib: "Qrenlandiya Danimarka deyil. Qrenlandiya Qrenlandiyadır".

Qrenlandiyalılar müstəqillik əldə edə bilsələr, çox qiymətli daşınmaz əmlaka nəzarət edəcəklər. Cəmi 57 min əhalisi olan və quru hissəsinin 80 faizi buzla örtülü olan adanın iqtisadi əhəmiyyəti cüzi görünə bilər, lakin strateji baxımdan əhəmiyyətlidir.

Aysel Şahmar