Putindən AKP ilə bağlı təlimat: Hazırlıq görülür

Rusiya prezidenti Vladimir Putin Türkiyənin hakim Ədalət və İnkişaf Partiyası (AKP) ilə bağlı öz partiyası Vahid Rusiya Partiyasına göstəriş verib.

Publika.az xəbər verir ki, AKP Xarici Əlaqələr İdarəsi tərəfindən hazırlanan proqram çərçivəsində partiya heyəti 6-9 noyabr tarixləri arasında Rusiyanın paytaxtı Moskvada görüşlər keçirəcək.

Nümayəndə heyətinə AKP sədrinin müavini Efkan Ala, sədr müavini Zəfər Sırakaya, partiyanın xarici əlaqələr üzrə sədr müavini İbrahim Halil Qorxmaz, o cümlədən siyasi və hüquqi məsələlər üzrə sədr müavini Ömər Serdar daxil olacaq.

Nümayəndə heyəti əvvəlcə Vahid Rusiya Partiyasının Baş Şurasının katibi Vladimir Yakuşev və katibin müavini Vladimir Vasilyevlə görüşəcək.

İclasda AKP ilə Vahid Rusiya Partiyasının 2009-cu ildə imzaladığı anlaşma memorandumuna əlavə olaraq 2025-2027-ci illəri əhatə edən əməkdaşlığın genişləndirilməsi və dərinləşdirilməsinə dair protokol imzalanacaq.

Protokolu AKP sədr müavini Zəfər Sırakaya və Vahid Rusiya Partiyası Ali Divan Bürosunun üzvü Andrey Klimov imzalayacaq.

Aysel Şahmar