Avropa İttifaqı “Meta”nı fantastik məbləğdə cərimələdi

Avropa İttifaqı (Aİ) Komissiyası “Facebook” və “Instagram” sosial media platformalarının sahibi “Meta”nı 797 milyon avro məbləğində cərimələdiyini açıqlayıb.

Publika.az xəbər verir ki, cəriməyə səbəb “Meta”-nın ittifaqın antiinhisar qaydalarını pozması olub.

Aİ Komissiyasının araşdırması müəyyən edib ki, “Meta” bütün Avropa İqtisadi Zonasında şəxsi sosial şəbəkələrdə və sosial mediada onlayn ekran reklam bazarındakı dominant mövqeyindən sui-istifadə edib.

Qərarda qeyd edilib ki, “Facebook Marketplace”-i “Facebook”-a inteqrasiya etməklə, bu sosial media platformasından istifadə edən hər kəs avtomatik olaraq “Facebook Marketplace”-ə daxil olur və istəsə də, istəməsə də müntəzəm olaraq buna məruz qalır. Bu vəziyyətin digər onlayn təsnifləşdirilmiş reklam xidməti təminatçıları üçün ədalətsiz ticarət şəraiti yaratdığı bildirilib.

Müvafiq olaraq, “Meta”-nın sözügedən hərəkətə dərhal son qoyması və gələcəkdə eyni pozuntunun təkrarlanmasından və ya oxşar məqsəd və ya təsiri olan hərəkətlərdən çəkinməsi qərara alınıb.

Roza