Əks-hücum olacaq, Həma çölündə müdafiə xətti gücləndirilir: Xəritə dəyişəcək

Noyabrın 28-də “Heyət Təhrir əş-Şam”ın (HTŞ) başçılıq etdiyi müxalif qüvvələrin hücumu nəticəsində Suriyada xəritə dəyişib. Belə ki, Tel Rıfat, İdlib və Hələbin böyük hissəsini nəzarətə götürən rejim əleyhdarları Həmada doğru irəliləməyə davam edirlər.

Publika.az xəbər verir ki, terror təşkilatı PYD/YPG Hələbin şimal-şərq bölgələrindən geri çəkilməyə başlayıb.

Kənd yerlərində intensiv toqquşmaların yaşandığı Həmada bəzi qəsəbələr rejim əleyhdarı qüvvələrin əlinə keçib. Suriyanın rəsmi dövlət xəbər agentliyi ordunun Həmada əks-hücuma hazırlaşdığını açıqlayıb. Bu səbəbdən Həma çölündə müdafiə xətlərinin gücləndirildiyi bildirilib.

Suriya Milli Ordusunun (SNA) “Azadlıq Şəfəqi” əməliyyatı ilə PYD/YPG-dən azad etdiyi Tel Rifat isə terrorçuların yerləşdirdiyi mina və partlayıcılardan təmizlənir. İllər əvvəl didərgin düşmüş dinc sakinlər Tel Rifata qayıdırlar.

Digər tərəfdən, diplomatiya təşəbbüslərinin davam etdiyi Suriyadakı son vəziyyətlə bağlı xarici işlər nazirləri səviyyəsində görüş keçirilə biləcəyi öyrənilib. İranın xarici işlər naziri Abbas Əraqçi Astana prosesi görüşünün dekabrın 7-8-də xarici işlər nazirləri səviyyəsində Dohada keçirilə biləcəyini açıqlayıb.

Qeyd edək ki, Tel Rifat 8 ildir ki, terror təşkilatı PKK-nın Suriya qolu YPD-nin işğalı altında idi.

Roza