Buna Putin qərar verəcək - Ər-Riyad görüşünün DETALLARI

Rusiya prezidentinin köməkçisi Yuri Uşakov Ər-Riyadda ABŞ nümayəndələri ilə görüşdən sonra bildirib ki, bütün məsələlərlə bağlı ciddi müzakirə aparılıb. O qeyd edib ki, Ukrayna böhranının həlli üçün ABŞ-la danışıqların nə vaxt başlayacağına Vladimir Putin özü qərar verəcək.

Publika.az xəbər verir ki, Uşakov bildirib ki, hələlik ABŞ və Rusiyanın mövqelərinin yaxınlaşdığını söyləmək mümkün deyil, lakin ən azı tərəflər “bir-birinin maraqlarını nəzərə alacaqları” və ikitərəfli münasibətləri inkişaf etdirəcəkləri barədə razılığa gəliblər.

Uşakov təsdiqləyib ki, tərəflər bir-birinə Ukrayna ilə bağlı fundamental yanaşmalarını açıqlayıblar. İndi Rusiya və ABŞ danışıqlarının ayrı-ayrı qrupları öz vaxtlarında Ukrayna ilə bağlı təmaslara başlayacaqlar. Belə danışıqların başlama tarixinə gəlincə, Uşakovun sözlərinə görə, Rusiya prezidenti Vladimir Putin bu barədə müstəqil qərar verəcək. Rusiya Federasiyasından danışıqlar aparacaq şəxslər arasında kimin olacağı barədə hələlik məlumat yoxdur. Onları da şəxsən Vladimir Putin təyin edəcək.

Rusiya liderinin köməkçisi onu da qeyd edib ki, Rusiya və ABŞ iki ölkə liderləri arasında gələcək görüş üçün şərait yaradılması üzərində işləmək barədə razılığa gəliblər. Eyni zamanda o, jurnalistlərin Vladimir Putinlə Donald Tramp arasında görüşün gələn həftə baş tuta biləcəyi ilə bağlı təkliflərinə şübhə ilə yanaşıb. Onun sözlərinə görə, hələ görüləsi işlər çoxdur.

Adəm Abbaslı