ABŞ Ukrayna münaqişəsinin nə vaxt bitəcəyini açıqladı

ABŞ dövlət katibi Marko Rubio Ər-Riyadda Rusiya nümayəndələri ilə danışıqlardan sonra Ukraynada münaqişənin hansı şərtlər altında dayandırılmasının mümkün olacağı ilə bağlı sualı cavablandırıb.

Publika.az bu barədə xarici mətbuata istinadən xəbər verir.

“Münaqişənin sona çatması üçün tərəflər bununla razılaşmalıdır”, - deyə Rubio bildirib.

ABŞ Dövlət Departamenti rəhbərinin sözlərinə görə, münaqişə tərəflərinin hər biri güzəştə getməli olacaq.

Avropa İttifaqına (Aİ) gəlincə, Rubio qeyd edib ki, Aİ müəyyən məqamda danışıqlar masası arxasında olmalıdır, çünki o da sanksiyalar tətbiq edib. Amma əsas məqsəd münaqişəyə son qoymaqdır. Eyni zamanda, dövlət katibi vurğulayıb ki, sülh ədalətli, uzunmüddətli, davamlı və bütün tərəflər üçün məqbul olmalıdır.

Rubio həmçinin təsdiqləyib ki, ABŞ Kiyev də daxil olmaqla, münaqişənin hər iki tərəfi ilə danışıqlar aparır.

Xatırladaq ki, bir müddət əvvəl ABŞ prezidenti Donald Trampın Ukrayna üzrə xüsusi nümayəndəsi Keyt Kelloq fevralın 19-da səhər tezdən Kiyevə gələcəyini və orada Vladimir Zelenski ilə danışıqlar aparacağını bildirib.

Bundan əlavə, Rubio ABŞ və Rusiya diplomatik nümayəndəliklərinin normal fəaliyyətinin bərpası məsələsini iki ölkə arasında danışıqlar prosesinin növbəti mərhələsi adlandırıb.

Adəm Abbaslı