ABŞ-dan bu ölkə ilə bağlı şok qərar - Hərbi yardım kəsildi

Tramp administrasiyası Misir ordusuna hərbi yardımı kəsmək qərarı ilə bağlı Qahirəyə xəbərdarlıq edib.

Publika.az xəbər verir ki, qeyri-rəsmi Misir nümayəndə heyəti bu yaxınlarda Vaşinqtona gedərək ABŞ-ın qərarının mümkün nəticələrini müzakirə edib.

Nümayəndə heyətində Ərəb Liqasının keçmiş baş katibi, Misirin keçmiş xarici işlər naziri və keçmiş sənaye naziri olub.

Misir rəsmiləri ABŞ administrasiyası ilə təmaslarında hərbi əməkdaşlığın vacibliyini vurğulayıblar. Həmçinin Misir ordusunun regional sabitliyi qorumaq məqsədi ilə hərəkət etdiyi bildirilib.

Heyət ABŞ rəsmilərinə fələstinlilərin Misir və ya İordaniyaya köçürülməsi planlarının təhlükələri barədə xəbərdarlıq edib: “Belə addımlar hər iki hökumətin sabitliyinə təhlükə yaradacaq”.

Sözügedən qərarın bu ildən etibarən qüvvəyə minməsi gözlənilir.

Qeyd edək ki, ABŞ təxminən 1,3 milyard dollarlıq illik hərbi yardımla Misir ordusunun müasirləşməsinə töhfə verirdi. Bu vəsait Amerika hərbi texnikasının alınmasına, şəxsi heyətin hazırlanmasına və hərbi infrastrukturun gücləndirilməsinə sərf edilib.

Roza