Hindistan Türkiyəyə qarşı "müharibə" elan etdi: Boykot başladı

Hindistan və Pakistan arasında artan gərginlikdə Türkiyənin Pakistana açıq dəstək verməsi Yeni Dehli administrasiyası və ictimaiyyətinin reaksiyalarına səbəb olub.

Publika.az xəbər verir ki, bu barədə Türkiyə mətbuatı məlumat yayıb.

Bildirilib ki, Hindistanda türk mənşəli məhsul və xidmətlərə qarşı hərtərəfli boykot başladılıb. Ölkədə fəaliyyət göstərən əsas ticarət platformaları Türkiyədən idxal olunan məhsulların satışını dayandırmaq qərarına gəlib. Boykot çərçivəsində xüsusilə tekstil sektoruna aid markalar daxildir. "LC Waikiki", "Koton" və "Mavi" kimi brendlərə aid məhsulların da siyahıya salındığı bildirilir.

Boykot təkcə rəqəmsal platformalarla məhdudlaşmır. Həmçinin ölkənin Prayaqrac şəhərində bəzi tərəvəzçilər də Türkiyədən gətirilən məhsullara reaksiya veriblər. Xüsusilə Türkiyə mənşəli almalar piştaxtalardan yığışdırılıb.

“Biz həmişə Türkiyəni dəstəkləmişik, lakin onlar bizə xəyanət ediblər”, - deyə səlahiyyətlilərdən biri söyləyib. Bir e-ticarət platformasının rəsmisi də mövzu ilə bağlı açıqlama verib: "Vətəndaşlarımızla həmrəy olaraq, ölkənin dəyərlərinə uyğun olmasını təmin etmək üçün platformalarda təklif etdiyimiz xidmətləri nəzərdən keçiririk”.

Bu bəyanatlar Hindistan ictimaiyyətinin Türkiyənin xarici siyasət mövqeyinə qarşı narazılığının konkret təzahürü kimi qiymətləndirilib.

Roza