Ən yaxın müttəfiqi ABŞ-dan üz döndərdi: Səbəb bəllidir

Birləşmiş Krallıq ABŞ-ın hərbi zərbələrində iştirak etmək istəmədiyi və hücumları qeyri-qanuni hesab etdiyi üçün Karib hövzəsində narkotik ticarəti ilə bağlı şübhəli gəmilər haqqında ABŞ-la artıq kəşfiyyat məlumatı paylaşmır.

Publika.az xəbər verir ki, bu barədə məsələ ilə tanış olan mənbələr CNN-ə bildiriblər.

Britaniyanın qərarı onun ən yaxın müttəfiqi və kəşfiyyat məlumatlarını paylaşan partnyoru ilə əhəmiyyətli bir qırılma olduğunu göstərir və ABŞ-ın Latın Amerikasındakı hərbi kampaniyasının legitimliyinə şübhənin artdığını vurğulayır.

Mənbələrin bildirdiyinə görə, illərdir Karib dənizində kəşfiyyat bölmələrinin yerləşdiyi bir neçə əraziyə nəzarət edən Britaniya Birləşmiş Ştatlara narkotik daşımaqda şübhəli bilinən gəmiləri müəyyən etməkdə kömək edib ki, ABŞ Sahil Mühafizəsi onların qarşısını ala bilsin.

Bu, gəmilərin dayandırılması, ekipajın saxlanılması və narkotiklərin götürülməsi demək idi. Kəşfiyyat məlumatları adətən Floridada yerləşən, bir neçə tərəfdaş ölkənin nümayəndələrinin daxil olduğu və qanunsuz narkotik ticarətinin qarşısını almaq üçün çalışan Birgə İdarələrarası İşçi Qüvvəyə ötürülürdü.

Bununla belə, ABŞ sentyabr ayında qayıqlara zərbələr endirməyə başlayandan qısa müddət sonra Birləşmiş Krallıqda ABŞ-ın hədəfləri seçmək üçün ingilislərin verdiyi kəşfiyyat məlumatlarından istifadə edə biləcəyi ilə bağlı narahatlıqlar yarandı. Britaniya rəsmiləri hesab edir ki, 76 nəfərin ölümü ilə nəticələnən ABŞ hərbi zərbələri beynəlxalq hüququ pozur. Onlar bildiriblər ki, kəşfiyyat fasiləsi bir ay əvvəl başlayıb.

Ötən ay BMT-nin İnsan Haqları üzrə rəhbəri Volker Tyurk zərbələrin beynəlxalq hüququ pozduğunu və “məhkəmədən kənar qətllər” olduğunu bəyan edib. CNN-ə verilən məlumata görə, Böyük Britaniya bu qiymətləndirmə ilə razıdır.

Tural