Dünya

Baş nazirin gərgin iş qrafiki mübahisə yaratdı: "Gündə 2 saat yatıram"

14 Noyabr 2025 14:36

Yaponiyanın Baş naziri Sanae Takaiçinin gərgin iş qrafiki ölkədə müzakirələrə səbəb olub.

Publika.az xəbər verir ki, Yaponiyada həddindən artıq işləmə ilə bağlı qanunvericilik komitəsinin iclasında çıxış edən Takaiçi gündə cəmi 2 saat yatdığını açıqlayıb.

“Hazırda təxminən 2 saat, ən çoxu 4 saat yatıram. Düşünürəm ki, bu, cildim üçün yaxşı deyil”, - o bildirib.

Baş nazir əlavə iş saatlarının iqtisadi artımı təşviq edə biləcəyini, eyni zamanda işçilərin sağlamlığını qorumaq üçün dəyişikliklərə ehtiyac olduğunu vurğulayıb: “Əgər insanların uşaq baxımı və digər məsuliyyətlərini düzgün tarazlaşdıra, boş vaxtlarından istifadə edib dincələ biləcəyi bir mühit yarada bilsək, bu, ideal olar”.

Ötən ay Yaponiyanın ilk qadın baş naziri seçilən Takaiçinin son açıqlamaları ölkədə “həddindən artıq işləməyi təşviq etməsi” kimi reaksiyalar doğurub.

Roza