Pentaqonun fiaskosu: F-35-in gizli hissələri Çinin əlinə keçdi

Amerikanın beşinci nəsil “F-35 Lightning II” qırıcı təyyarəsi üçün potensial həssas komponentlər səhvən Çinə göndərilib və orada yoxlamaya məruz qala bilər.

Publika.az xəbər verir ki, bu barədə “Bloomberg” məlumat yayıb.

Sözügedən komponentlər, o cümlədən örtük və silah bölməsinin lyuku “Lockheed Martin” tərəfindən istehsal olunub.

“Bloomberg” mənbələrinə görə, komponentlər mümkün təmir və ya utilizasiya üçün may ayında Avstraliyadan ABŞ-a göndərilib. UPS hələ də bəlli olmayan səbəblərdən onları Honkonqa çatdırıb. Pentaqon rəsmiləri əvvəllər hissələri geri qaytarmaq və halları aydınlaşdırmaq üçün çalışdıqlarını bildirmişdilər.

Sözügedən komponentlər təyyarənin radar gizliliyini təmin edən məxfi texnologiyalardan istifadə edilərək istehsal olunub. Mənbələrə görə, Çin hakimiyyəti hissələri alıb, lakin hələ də geri qaytarmayıb. Çin tərəfindən bu məlumatın rəsmi təsdiqi yoxdur.

ABŞ Çinin F-35 haqqında daha çox məlumat axtardığına inanır. Bununla bağlı narahatlıqlar bu qırıcıların BƏƏ-yə satılması ilə bağlı müqavilənin uğursuz olmasının səbəblərindən biri olub. Nəşr F-35 proqramına dəyə biləcək potensial zərərin təfərrüatlarını açıqlamır.

“F-35 Lightning II”, “Lockheed Martin” tərəfindən hazırlanmış beşinci nəsil çoxməqsədli qırıcıdır. O, ABŞ və onun müttəfiqlərinə, o cümlədən Avstraliya, Birləşmiş Krallıq, Yaponiya və Cənubi Koreyaya təchiz edilir. F-35 proqramı hərbi aviasiya tarixində ən bahalı proqramlardan biri hesab olunur. Təyyarənin gizli texnologiyaları və göyərtə sistemləri Amerika müdafiə sənayesinin ən ciddi qorunan sirləri arasındadır.

Müəllif: Tural