Xəzərin “qatil karides”i İngiltərədə tapıldı, ara qarışdı: Ora necə gedib?

Böyük Britaniyada "qatil karides" kimi tanınan invaziv amfipod xərçəngkimiləri aşkar edilib.

Publika.az xəbər verir ki, BBC-nin məlumatına görə, mütəxəssislər bunun yerli ekosistemlərə zərər verə biləcəyindən ehtiyat edirlər.

Sözügedən növ Xəzər dənizinə məxsus “Dikerogammarus haemobaphes”dir. Bu xərçəngkimilər bir çox yerli növlərdən daha böyükdür və arxalarında fərqli zolaqlı naxışla fərqlənirlər.

Bu növün nümayəndəsi, Uiltşir və Berkşirdən axan Kennet çayının bir qolu olan Holy Brookda aşkar edilib.

"Qatil karides" kiçik balıqlar və onların yumurtaları ilə qidalanaraq yerli balıqları sıxışdıra bilər. Bundan əlavə, qidalanma və davranış xüsusiyyətlərinə görə bu növ suyun keyfiyyətinin pisləşməsinə səbəb ola bilər. Xərçəngkimilərin Böyük Britaniyaya qayığın gövdəsinə yapışaraq gəldiyi güman edilir. Daha sonra kayakçılar və balıqçılar tərəfindən bilmədən onu avadanlıqlarında daşımaları səbəbindən digər su yollarına da yayıla bilər.

Mütəxəssislər su idmanı və balıqçılıq həvəskarlarını "Yoxla, Təmizlə, Quru" qaydasına riayət etməyə çağırıblar.

Bu, istifadədən sonra avadanlığın yoxlanılmasını, yaxşıca təmizlənməsini və başqa bir su hövzəsinə getməzdən əvvəl tamamilə qurudulmasını tələb edir.

Bu yolla mütəxəssislər invaziv növlərin daha da yayılmasının qarşısını almağa və yerli su ekosistemlərinə təhlükəni azaltmağa ümid edirlər.

Müəllif: Tural