İsrail prezidentindən Netanyahuya: Yəhudi millətçiliyi adı altında zorakılıq baş verir

İsrail prezidenti İsaak Hersoq ölkənin yüksək vəzifəli şəxslərinə, o cümlədən Baş nazir Benyamin Netanyahuya məktub göndərərək işğal altındakı İordan çayının qərb sahilində artan zorakılığın vətəndaş müharibəsinə səbəb ola biləcəyi barədə xəbərdarlıq edib.

Publika.az xəbər verir ki, bu barədə İsrailin “Channel 12” telekanalı məlumat yayıb.

Bildirilib ki, Hersoq müdafiə naziri İsrael Kats, Baş Qərargah rəisi Eyal Zamir və baş prokuror Qali Baharav-Miaraya da məktublar ünvanlayıb.

İsrail prezidenti Fələstin torpaqlarını zəbt edən israillilərin zorakılığının və millətçi terrorizmin artmasından narahatlığını ifadə edib. O, əsgərlərin vətəndaş müharibəsinə gətirib çıxara biləcək ciddi etik və əməliyyat dilemması ilə üzləşdiyini vurğulayıb.

Hersoq yəhudi millətçiliyi adı altında törədilən zorakılığı “mənəvi rüsvayçılıq və İsrailin üzərində qara ləkə” adlandırıb. O, bu halları birbaşa mütəşəkkil cinayətkarlıq fəaliyyəti kimi qiymətləndirərək, belə qanunsuzluqlara son qoyulmasını tələb edib.

Hersoqun sözlərinə görə, zorakılığın qarşısı alınmasa, ölkə fəlakət və vətəndaş müharibəsi ilə üzləşə bilər.

Müəllif: Roza