İŞİD və “Əl-Qaidə” bu yola da əl atdı

İŞİD və “Əl-Qaidə” terror təşkilatları internet platformalarından yeni tərəfdarlar cəlb etmək, potensial hədəflər tapmaq və təbliğat aparmaq üçün fəal istifadə edirlər.

Publika.az xəbər verir ki, bu barədə Rusiya Xarici Kəşfiyyat Xidmətinin direktor müavini Mixail Maksimoviç ŞƏT-in təhlükəsizlik üzrə “ŞƏT plus” ekspert dialoqunda çıxışı zamanı bildirib.

Onun sözlərinə görə, ŞƏT məkanında fəaliyyət göstərən qruplaşmalar arasında rəqəmsal texnologiyalara ən yaxşı yiyələnənlər məhz İŞİD və “Əl-Qaidə”dir. Bu təşkilatlar onlayn platformalardan xüsusilə üzv cəlb etmək və təbliğat aparmaq məqsədilə istifadə edirlər.

Maksimoviç qeyd edib ki, terrorçular generativ süni intellekt vasitəsilə konkret etnik qruplara ünvanlanan, müxtəlif milli dillərdə hazırlanmış materiallar yayırlar.

Bu materiallara odlu silahlardan, kustar üsulla hazırlanmış partlayıcı qurğulardan istifadə, eləcə də partlayıcı maddələrin daşınması üçün pilotsuz uçuş aparatlarının tətbiqi ilə bağlı audio və video təlimatlar daxildir.