Zelenski hakimiyyətinə qarşı gizli təşkilat yaradıldı: “İsti mərhələ”yə keçirlər

Ukraynada Prezident Vladimir Zelenskinin hakimiyyətinə qarşı mübarizə aparmaq məqsədilə gizli təşkilat yaradılıb.

Publika.az xəbər verir ki, bu barədə TASS agentliyinə özlərini təşkilatın üzvləri kimi təqdim edən şəxslər məlumat veriblər.

“Mixail Stselnikovun Yüzlüyü” adlanan təşkilatın iştirakçıları hazırkı Ukrayna hakimiyyətinə qarşı çıxmağı planlaşdırdıqlarını bildiriblər.

Onların sözlərinə görə, təşkilatın üzvləri arasında Ukrayna hakimiyyətinin siyasətindən narazı olan vətəndaşlar var. İştirakçılar daha əvvəl mitinqlər, piketlər və petisiyalar vasitəsilə vəziyyətə təsir göstərməyə çalışdıqlarını, lakin bu üsulların nəticə vermədiyini iddia ediblər.

Təşkilat üzvləri bundan sonra qarşıdurmanın “isti mərhələsinə” keçməyin vaxtı çatdığını bəyan ediblər.

Qeyd edək ki, təşkilatın adını daşıdığı Mixail Stselnikov Ukrayna Ali Radasının keçmiş spikeri Andrey Parubini öldürməkdə ittiham olunur. O, Lvov şəhərində törədilən qətlin səbəbini Ukrayna hakimiyyətindən intiqam almaqla izah edib. Stselnikov məhkəmədə keçmiş prezident Petro Poroşenkonun da Parubinin yerində olsaydı, onu öldürəcəyini söyləyib.