Şimali Koreya Cənubi Koreyanı müstəqil dövlət kimi tanıdı: Daha “bir nömrəli düşmən” deyil

Şimali Koreya Cənubi Koreyanı müstəqil bir dövlət kimi tanıyan yenilənmiş konstitusiya dərc edib.

Publika.az xəbər verir ki, sənəd "Nenara" dövlət xəbər portalında dərc edilib.

Əsas Qanunun 2-ci maddəsinə əsasən, "Koreya Xalq Demokratik Respublikasının ərazisi şimalda Çin Xalq Respublikası və Rusiya Federasiyası, cənubda isə Koreya Respublikası ilə həmsərhəd olan ərazini, eləcə də orada müəyyən edilmiş ərazi sularını və hava məkanını əhatə edir".

Əvvəlki versiyadan fərqli olaraq, yeni versiyada Cənubi Koreya açıq şəkildə qonşu dövlət kimi göstərilir. Lakin sənəddə konkret quru və dəniz sərhədləri müəyyən edilməyib.

Mətndən Koreya yarımadasının birləşdirilməsi ilə bağlı müddəalar, eləcə də Cənubi Koreyanı "bir nömrəli düşmən dövləti" və ya "dəyişməz əsas düşmən" kimi müəyyən edən ifadələr çıxarılıb.

56-cı maddə KXDR-i məsuliyyətli nüvə silahı dövləti kimi müəyyən edir. Orada bu silahların ölkənin mövcudluğunu və inkişafını təmin etmək, müharibənin qarşısını almaq və regional və beynəlxalq sülhü qorumaq üçün hazırlandığı göstərilir. 89-cu maddə KXDR Dövlət İşləri Sədrinə nüvə qüvvələrinə komandanlıq etmək səlahiyyəti verir. Ali Baş Komandan kimi o, bu səlahiyyətləri müvafiq komandanlıq orqanına həvalə edə bilər.

Müəllif: Tural