Britaniyadan Rusiyaya TƏHDİD: NATO-ya hücum çağırışı etdi

Böyük Britaniyanın keçmiş baş nazirinin milli təhlükəsizlik üzrə müşaviri Mark Sedvill Londonu və NATO-nu Rusiyaya qarşı hücum xarakterli addımlar atmağa çağırıb.

Publika.az “Daily Mail” nəşrinə istinadən xəbər verir ki, o, bu barədə “Atlantic Future Forum” konfransında çıxışı zamanı danışıb.

Sedvill bildirib ki, bəzən ən effektiv müdafiə üsulu rəqibi çətin seçim qarşısında qoymaq və hücuma keçməkdir. Onun sözlərinə görə, Qərb Rusiyaya qarşı strateji təzyiq mexanizmlərini gücləndirməli, Moskvanı təhlükə hiss etməyə məcbur etməlidir.

Britaniyalı siyasətçi Qərb müttəfiqlərinin təşəbbüsü Rusiyaya verməməli olduğunu vurğulayıb. O, Rusiyaya quruda, dənizdə, hava məkanında, eləcə də informasiya və kiberməkanda kompleks təzyiq göstərilməsinin vacibliyini qeyd edib.

Qeyd edək ki, Rusiya da NATO-nun qərb sərhədləri yaxınlığında hərbi fəallığını dəfələrlə tənqid edib. Kreml Moskvanın digər ölkələr üçün təhlükə yaratmadığını, lakin milli maraqlarına potensial təhdid doğuran addımlara cavab verəcəyini bildirib.

Müəllif: Adəm