AMEA tarixində İLK - FOTO

Azərbaycan Milli Elmlər Akademiyasının prezidenti, akademik Akif Əlizadə Birləşmiş Krallığın “Millers Oils Ltd” şirkətinin icraçı direktoru Ceyms Rian, şirkətin Biznesin inkişafı departamentinin rəhbəri Martin Qouf və şirkətin texniki işlər üzrə direktoru Martin Mann ilə görüşüb.
AMEA Rəhasət Heyətindən Publika.az-a verilən məlumata görə, görüşdə akademik Akif Əlizadə “Millers Oils Ltd” şirkətinin zavoduna səfərindən danışıb, orada yaradılan şəraitdən məmnunluğunu bildirib. Qeyd edib ki, sözügedən şirkət AMEA-nın tarixində ilk dəfə olaraq Akademiyanın rezidenti kimi fəaliyyət göstərəcək. Akademik Akif Əlizadə AMEA ilə “Millers Oils Ltd” şirkəti arasında əməkdaşlığın gələcəkdə Azərbaycanda tətbiqi araşdırmaların daha da genişlənməsinə gətirib çıxaracağına əminliyini bildirib.

Şirkətin icraçı direktoru Ceyms Rian AMEA ilə əməkdaşlığa önəm verdiklərini və Yüksək Texnologiyalar Parkında yaradılan şəraitdən məmnun qaldıqlarını qeyd edib.

Görüşün sonunda akademik Akif Əlizadə şirkətin sahibkarlıq subyekti olaraq AMEA ilə birgə istehsalatla məşğul olmaq hüququnu təsdiq edən müvafiq sənədləri və möhürü Ceyms Riana təqdim edib, iki təşkilat arasında gələcək əməkdaşlığın çox səmərəli olacağına əminliyini bildirib.

Görüşdə AMEA-nın vitse-prezidenti, akademik İbrahim Quliyev, AMEA-nın İşlər İdarəsinin müdiri, siyasi elmlər üzrə elmlər doktoru Fətəli Abdullayev və AMEA “Elm və Texnologiya Parkı” Məhdud Məsuliyyətli Cəmiyyətinin rəhbəri Sənan Abdullayev iştirak ediblər.