Qarabağ və Şərqi Zəngəzura köçən ailələrə "kupça" veriləcək?

Azad edilmiş ərazilərdə bərpa-quruculuq işləri ilə yanaşı, köç prosesi də sürətlə davam edir.

Publika.az xəbər verir ki, hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 minə yaxın insan yaşayır.

Maraqlıdır, bəs görəsən, Qarabağa və Şərqi Zəngəzura köçən ailələrə verilən mənzillər çıxarış ("kupça") ilə təmin olunacaqmı?

Məsələ ilə əlaqədar Əmlak Məsələləri üzrə Dövlət Xidmətindən Oxu.Az-ın sorğusuna cavab olaraq bildirilib ki, Qaçqınların və Məcburi Köçkünlərin İşləri üzrə Dövlət Komitəsi tərəfindən müvafiq normativ hüquq aktının layihəsi hazırlanıb.

"Layihə qüvvəyə mindikdən sonra sözügedən yaşayış sahələri üzərində vətəndaşların hüquqlarının dövlət qeydiyyatının aparılması məsələsinə baxılması təmin ediləcək".