Dekabrda dolları nə gözləyir?

FED-in Federal Açıq Bazar Komitəsinin (FOMC), Vaşinqtonda keçirdiyi toplantısında faiz dərəcəsi dəyişdirilməyərək 0.25%- 0.50% aralığında saxlandı.

Publika.az xəbər verir ki, onsuz da bu toplantıda bazar iştirakçıları, iqtisadçılar FED-in faiz artımına getməyəcəyini gözləyirdilər.

Bankın açıqlamasında bildirilir ki, iclasda FED rəsmiləri sürətlənən inflyasiya şəraitində faiz artımı üçün zəminin gücləndiyini deyiblər. Bu da dekabr ayında faiz artımının baş verəcəyini göstərir.

Komitə federal fond faizində (uçot dərəcəsi) artım üçün zəminin güclənməkdə olduğunu deyib. Bildirilib ki, hədəflərə doğru davam edən poseslərdən daha çox işarə görmək üçün bir az da gözləyəcəklər.

FED rəsmiləri açıqlamada, inflyasiyanın 2 faiz olan hədəflərinə doğru hərəkət etdiyi barədə artan inamlarına da yer veriblər.

ABŞ Mərkəzi Bankı açıqlamasında qiymət artımlarının (inflyasiyanın) sürətinin bu ilin əvvəlindən bu yana artdığını və inflyasiyaya dair bazar əsaslı göstəricilərin yuxarı istiqamətdə hərəkət etdiyini bildirib.

Komitə həmçinin, keçən açıqlamasındakı, inflyasiyanın yəqin ki, “yaxın perspektivdə aşağı qalacaq” şəklindəki ritorikasına bu açıqlamasında yer verməyib.

Gələn həftə ABŞ-da prezident seçkisi keçiriləcəyindən FED-in bu iclasda faizləri artırmayacağı bəlli idi. Lakin dekabrda faiz artımına gediləcəyi istisna edilmir.

Qeyd edək ki, komitənin sentyabr ayındakı iclasında verdiyi qərara müxalif qalan üç üzvdən ikisi – FED-in Klivlend sədri Loretta Mester və Kanzas Siti sədri Esther Corc, bu toplantıda da siyasət faizinin 0.25-0.50% intervalına yüksəlməsinə səs veriblər. Üçüncü FED üzv Boston Fed Erik Rosengren, faizin dəyişdirilməməsi qərarına dəstək verib.

Onu da bildirək ki, 2016-ci ilin sonuna qədər FED-in faiz artımına gedəcəyi ehtimalı iyun ayından bu yana ən yüksək səviyyədədir – təxminən 70 faiz civarında.

Xatırladaq ki, FOMC-ın növbəti iclası 13-14 Dekabr 2016-cı il tarixlərində keçiriləcək.

İqtisadiyyat şöbəsi