Şəhid qızını öldürən direktor oğlu MƏHKƏMƏ QARŞISINDA

Bakıda ölümlə nəticələnən yol-nəqliyyat hadisəsi törətməkdə təqsirləndirilən Rəhim Rəhimovun cinayət işi üzrə məhkəmə prosesi keçirilib.

Publika.az-ın xəbərinə görə, bu gün Bakı Ağır Cinayətlər Məhkəməsində hakim Novruz Kərimovun sədrliyi ilə baş tutan prosesdə Rəhim Rəhimovun barəsində istintaq zamanı seçilən həbs qətimkan tədbiri müddətinin fevralın 2-də başa çatacağı elan edilib.

Hakimlər kollegiyasının qərarı ilə müddət artırılıb.

Cinayət işi məhkəmə baxışına qəbul edilib.

Proses fevralın 1-də davam edəcək.

İttihama görə, ötən il noyabrın 8-də Səbail rayonu, Salyan yolu küçəsində Bakı şəhər sakini, 42 yaşlı Könül Elton qızı Əkbərova yolun piyadalar üçün nəzərdə tutulmayan hissəsindən keçmək istəyərkən “Jeep Grand Cherokee” markalı avtomaşınla vurulub və aldığı xəsarətlər nəticəsində hadisə yerində ölüb.

Sürücü isə hadisə yerindən qaçıb.

İstintaq zamanı hadisə yerinə və avtomaşına, həmçinin ərazidəki təhlükəsizlik kameralarına baxış keçirilib, fotoşəkillər çəkilərək baxış protokoluna əlavə olunub, məhkəmə-tibb ekspertizası keçirilib.

Aparılmış profilaktiki tədbirlər nəticəsində yol-nəqliyyat hadisəsini törətməkdə şübhəli bilinən Bakı şəhər sakini Rəhim Rəhimov könüllü olaraq Səbail rayon Polis İdarəsinin 8-ci polis bölməsinə gələrək özünü istintaqa təqdim edib.

Rəhim Rəhimovun atası Akif Rəhimovun “Xırdalan-Xəz” Açıq Tipli Səhmdar Cəmiyyətinin direktoru olduğu bildirilir.

Könül Əkbərova şəhid Elton Əkbərovun qızıdır.

Hacı Zeynalov