"Vergiyə görə beləydi, Leyla Şıxliniskayanın hər şeydən xəbəri vardı" - MƏHKƏMƏ

Leyla Şıxlinskayanın Klinikasında baş mühasib işləmiş Şəhla Abbasova, mühasib Səkinə Əfəndiyeva, klinikanın əməkdaşları Polad Əliyev, Səkinə Qasımova, Aytən Hüseynova, Mədinə Hüsiyeva, Yelena Abdullayevanın cinayət işi üzrə məhkəmə prosesi keçirilib.

Publika.az xəbər verir ki, bu gün Bakı Ağır Cinayətlər Məhkəməsində hakim Əfqan Hacıyevin sədrliyi ilə baş tutan prosesdə şahid Yeganə Şahnazərova ifadə verib.

O deyib ki, klinikada iki dəfə müalicə alıb: "Qohumlarım pul ödəyib, məbləği bilmirəm".

Şahid Yelena Smirnova bildirib ki, klinikada növbətçi həkim işləyir: "Ayda bir dəfə mühasibatlıqdan pulumuzu alırdıq. Növbətçi qaldığım hər gecə üçün 50 manat, bayram günləri 70 manat alırdım. Maaşım da növbətçi qaldığım günlərə görə hesablanırdı".

Şahid Sevda Əlizadənin sözlərinə görə, klinikada 8 il baş həkimin müavini, sonra isə 2 il direktor vəzifəsində çalışıb: "Mən direktor təyin edəndə Leyla Şıxlinskaya qarşıma şərt qoydu ki, maliyyə işlərinə qarışmayım. Mən yalnız əməliyyatlara nəzarət edirdim. Direktor təyin olunanda maaşı kartla almışam. Bütün işçilər də maaşını kartla verildiyini bilirdi, çünki klinikada bankomat quraşdırılmışdı.

Maaşımın bir hissəsini kartla, qalanını əlbəəl almışam. Dəqiq bilmirəm, amma yəqin vergiyə görə belə idi. Leyla Şıxliniskayanın hər şeydən xəbəri var idi. Maliyyə işlərinə özü nəzarət edirdi".

Növbəti proses aprelin 6-da davam edəcək.

Leyla Şıxlinskayanın Klinikasında baş mühasib işləyən Şəhla Abbasova, mühasib Səkinə Əfəndiyeva, klinikanın əməkdaşları Polad Əliyev, Səkinə Qasımova, Aytən Hüseynova, Mədinə Hüsiyeva, Yelena Abdullayeva Cinayət Məcəlləsinin 179.3.2-ci (külli miqdarda mənimsəmə və ya israf etmə) və 313- cü (vəzifə saxtakarlığı) maddələri ilə ittiham olunurlar.

Cinayət işi Baş prokurorluq yanında Korrupsiyaya qarşı Mübarizə Baş İdarəsində araşdırılıb.

Xatırladaq ki, Leyla Şıxlinskayanın Klinikasının keçmiş baş mühasibi Şəhla Abbasova 4 il əvvəl Leyla Şıxlinskaya ilə mübahisəyə görə işdən ayrılıb.

Leyla Şıxlinskaya hüquq-mühafizə orqanlarına müraciət edərək, keçmiş işçilərinin 804 min 343 manat vəsaiti ələ keçirməkdə ittiham edib.

Leyla Şıxlinskayanın Klinikasında aparılan araşdırmalar zamanı müəssisənin rəhbəri Leyla Şıxlinskayanın vergidən 8 milyon manat yayındırdığı aşkarlanıb. Hazırda Vergilər Nazirliyinin istintaq idarəsində araşdırma aparılır.