• USD 1,7000 0,00% EUR 1,9190 -0,03%
    • GBP 2,2589 +0,40% RUB 0,0229 -0,87%

Gömrükçülərdən UĞURLU ƏMƏLİYYAT: 622 kq-dan çox narkotik aşkarlandı

Gömrükçülərdən UĞURLU ƏMƏLİYYAT: 622 kq-dan çox narkotik aşkarlandı

Dövlət Gömrük Komitəsinin Əməliyyat və İstintaq Baş İdarəsinə daxil olan məlumatlar əsasında, gömrük əməkdaşları iki fakt üzrə ümumi çəkisi 622 kiloqram 075 qram olan narkotik vasitənin gömrük nəzarətindən gizlədilərək keçirilməsi cəhdinin qarşısını alıblar.

Publika.az-a verilən məlumata görə, Cənub Ərazi Baş Gömrük İdarəsinin “Astara” gömrük postunda İran İslam Respublikasının vətəndaşı Farangız Rahmanı Alkamı tərəfindən göndərilən, Azərbaycan Respublikası ərazisindən tranzit keçməklə Moldova Respublikasına “kişmiş” yükü aparan “Renault” markalı yük avtomobili saxlanılıb. Sorğu-sual zamanı sürücü idarə etdiyi avtomobildə yük sənədlərində göstərilən “kişmiş” yükündən başqa gömrük nəzarətindən gizlədilən və gömrük nəzarətinə bəyan edilməli hər hansı predmetin olmadığını bildirib.

Lakin həmin nəqliyyat vasitəsinə kinoloji xidmət iti tətbiq edilməklə keçirilən yoxlama zamanı xidməti it avtomobilin dartıcısının sol ətrafına reaksiya verib. Daha sonra nəqliyyat vasitəsi rentgen qurğusundan keçirilən zaman avtomobilin sol yanacaq çəninin içərisində sıxlıq müşahidə edilib. Yük avtomobilinin ətraflı yoxlanılması zamanı isə yanacaq çəninin kustar üsulla metal lövhə ilə iki hissəyə bölündüyü məlum olub. Baxış zamanı iki hissəyə bölünmüş yanacaq çəninin bir hissəsində qablaşdırılması ilə birlikdə çəkisi 301 kiloqram 475 qram olan narkotik vasitə - heroin aşkarlanıb.

Digər əməliyyat məlumatına əsasən isə Azərbaycan Respublikası vətəndaşının idarə etdiyi “DAF” markalı yük avtomobili Şimal Ərazi Baş Gömrük İdarəsinin “Samur” gömrük postunda saxlanılıb.

Azərbaycan Respublikasından tranzit keçməklə Moldova Respublikasına “Qabıqlı püstə” və “xurma” yükü aparan həmin avtomobil “Samur” gömrük postunda rentgen qurğusundan keçirilən zaman şübhəli təsvirlər müşahidə edilib. Baxış zamanı bu avtomobilin yanacaq çəninin də metal lövhə ilə iki hissəyə bölündüyü, bir hissədə dizel yanacağı, digər hissədə isə qablaşdırılması ilə birlikdə çəkisi 320 kiloqram 600 qram olan narkotik vasitə - heroin aşkar edilib.

Hər iki faktla bağlı araşdırma aparılır.

Halal Nemət

Xəbər lenti

DAHA ÇOX XƏBƏR