Hadisə

Bakıda qadınları təqib edən gənc oğlan həbs edildi

25 Noyabr 2024 16:04

Bakıda qadınları təqib edərək onlara qarşı xuliqanlıq hərəkətləri etmiş şəxsin kimliyi müəyyənləşib.

Publika.az-ın əldə etdiyi məlumata görə, Xəzər Rayon Polis İdarəsinin 3-cü Polis Şöbəsinin həyata keçirdiyi tədbirlərlə qadınları təqib edərək onların narahatlığına səbəb olmuş şəxsin Astara rayonu Hamuşam kənd sakini 2001-ci il təvəllüdlü Vurğun Seyfullazadə olması müəyyən edilib.

Binə qəsəbəsi Südçülük sovxozu massivində yaşayan iki qadın Vurğunun əməlləri barədə polisə şikayət ediblər. Onlar qeyd ediblər ki, Vurğun yaxınlaşaraq əxlaqsız sözlər deyir və evlərinin qapısına kimi gələrək xuliqanlıq edir.

Polis tərəfindən saxlanılan gənc isə Südçülük sovxozu ərazisində məhəlləyə nəzarət etdiyini, təhlükəsizliyə cavabdeh olduğunu iddia edib və qadınları da buna görə izlədiyini deyib.

Xəzər rayon Məhkəməsinin qərarı ilə o, xırda xuliqanlıq əməlində təqsirli bilinib. 23 yaşlı oğlana 10 sutkalıq həbs cəzası verilib.

Turqut Seyidov