Gəncədə kütləvi dava: Bir nəfər öldü, üç nəfər yaralandı - YENİLƏNDİ

Bu gecə Gəncə şəhərində 43 yaşlı Azər Yusifovun ölümü və daha üç nəfərin bıçaqlanması ilə nəticələnən kütləvi davanın bəzi təfərrüatları bilinib.

Publika.az Teleqraf-a istinadən xəbər verir ki, dava şəhərdəki "Günəş" restoranında baş verib. Tanışlar restoranda yeyib-içdikdən sonra mübahisə ediblər.

A.Yusifov mübahisə edən şəxsləri ayırmaq istəyərkən bıçaqlanıb. O, hadisə yerində vəfat edib.

Dava zamanı daha üç nəfər - 1995-ci il təvəllüdlü Rahib Bayramlı, 1998-ci il təvəllüdlü Tural İlyasov və Azamat Peşerskiy bıçaqlanıb. Keçirilən əməliyyat-axtarış tədbirləri nəticəsində hadisəni törətməkdə şübhəli bilinən 20 yaşlı Mirad Məmmədzadə saxlanılaraq istintaqa təhvil verilib.

Faktla bağlı Gəncə şəhər Prokurorluğunda araşdırma başlanılıb.

xxx

Kütləvi dava zamanı qətl törətməkdə şübhəli bilinən şəxs həbs olunub.

Publika.az Teleqraf-a istinadən xəbər verir ki, polis əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən 2006-cı il təvəllüdlü Mirad Məmmədzadə saxlanılaraq istintaqa təhvil verilib.

xxx

Gəncədə kütləvi dava ölümlə nəticələnib.

Publika.az Teleqraf-a istinadən xəbər verir ki, hadisə şəhərdə fəaliyyət göstərən restoranlardan birinin qarşısında baş verib.

Dava zamanı 1983-cü il təvəllüdlü Azər Yusifov bıçaqlanıb. O, aldığı xəsarətlərdən hadisə yerində ölüb.

Hadisə zamanı daha üç nəfər - 1995-ci il təvəllüdlü Rahub Bayramlı, 1998-ci il təvəllüdlü Tural İlyasov və həmyaşıdı Azamat Peşerskiy bıçaq xəsarətləri alıblar. Yaralılar Gəncədə yerləşən xəstəxanalardan birinə çatdırılıblar.

Hadisə yerinə polis əməkdaşları cəlb olunub.

Faktla bağlı hüquq-mühafizə orqanları tərəfindən araşdırma aparılır.